Старшыня камісіі пераблытала лічбы, бо дрэнна сябе адчувала. Ярмошына адказала назіральніку з Бярозы
Незалежны назіральнік з Бярозы Сяржук Русецкі атрымаў адказ ад Цэнтрвыбаркама на свой зварот адносна абрання Дзмітрыя Гукіна дэпутатам Першамайскага сельскага Савета Бярозаўскага раёна. Справа ў тым, што, паводле пратакола аб выніках падліку галасоў ад 18 лютага, за Гукіна прагаласавала менш выбаршчыкаў, чым супраць яго, што робіць немагчымым яго перамогу на выбарах.
У сваім адказе старшыня ЦВК Лідзія Ярмошына паведаміла, што ў сувязі з пададзенай назіральнікам заявай была праведзена праверка.
У ходзе яе высветлілася, што па заяве самога Дзмітрыя Гукіна, які палічыў лічбы ў фінальным пратаколе памылковымі, на выбарчым участку № 30 быў праведзены паўторны падлік галасоў. І пасля яго аказалася, што ў пратаколе ад 18 лютага былі памылкова перастаўлены месцамі лічбы аб колькасці выбаршчыкаў, якія прагаласавалі за кандыдата і супраць яго. То бок 39 выбаршчыкаў прагаласавала супраць усіх, а 50 - за Гукіна, а не наадварот, як было напісана ў пратаколе.
Сябры ўчастковай камісіі ўчастка для галасавання № 30 патлумачылі гэтую памылку тым, што самаадчуванне старшыні камісіі падчас падліку галасоў рэзка пагоршылася. Гэты факт, паводле слоў сябраў камісіі, могуць пацвердзіць і назіральнікі ўчастка.
Ярмошына паведамляе, што па выніках паўторнага падліку галасоў Першамайскай сельскай выбарчай камісіяй складзены новы пратакол, які пацвярджае выбранне Дзмітрыя Гукіна дэпутатам Першамайскага сельскага Савета дэпутатаў.